सामाजिक फीड
जनकपुरधाम, भाद्र ६
नेपाल उद्योग वाणिज्य महासंघले स्टार्टअप व्यवसायहरूको प्रवर्द्धन र विकासलाई प्रोत्साहन गर्ने उद्देश्यले १० अर्ब रुपैयाँको पुँजीसहित नयाँ लगानी कम्पनी स्थापना गरेको छ। महासंघका अध्यक्ष चन्द्रप्रसाद ढकालले बुधबार राजधानीमा आयोजित ‘स्टार्टअप नेसन २०३०’ कार्यक्रममा यसबारे घोषणा गरेका हुन्।
अध्यक्ष ढकालका अनुसार यो लगानी कम्पनीले विभिन्न स्टार्टअपहरूमा स्वतन्त्र रूपमा लगानी गर्नेछ। उनले यो कम्पनीको संरचना र सञ्चालन प्रक्रिया स्वतन्त्र रहने जानकारी दिँदै, कुनै पनि इच्छुक लगानीकर्ताले यस कम्पनीमा लगानी गर्न सक्ने व्यवस्था रहेको बताए। यस कम्पनीको प्राथमिक उद्देश्य नवप्रवर्तन र नयाँ उद्यमीहरूलाई आवश्यक आर्थिक सहयोग पुर्याउनु रहेको छ।
ढकालले स्टार्टअप नीति पारित भएको र नेपाल उद्योग वाणिज्य महासंघले यो नीतिको पहिलो मस्यौदा सरकारसमक्ष प्रस्तुत गरेकोमा खुसी व्यक्त गरे। उनले युवाहरूलाई उद्यमशीलताको क्षेत्रमा प्रोत्साहन गर्न इन्क्युबेशन र इनोभेसन सेन्टरहरू स्थापना गर्नुपर्ने आवश्यकता पनि औंल्याए।
यो नयाँ पहलले नेपालमा स्टार्टअप संस्कृति विस्तार गर्न, युवाहरूलाई उद्यमशीलतातर्फ आकर्षित गर्न र आर्थिक वृद्धिमा महत्वपूर्ण योगदान दिने अपेक्षा गरिएको छ।
गतिमान साह सामाजिक फीडका संवाददाता हून् ।