सामाजिक फीड-
जनकपुरधाम, भदौ १९ गते ।
अख्तियारको कर्मचारी भन्दै जनकपुरमा व्यवसायीबाट ठगी गर्ने दुई जना पक्राउ परेका छन् । पक्राउ पर्नेमा धनुषाको हंसपुर नगरपालिका ३ बस्ने ३७ वर्षीय अनिल सिंह र सोही ठाउँका ३२ वर्षीय राहुल सिंह रहेको प्रहरीले जनाएको छ ।
धनुषा प्रहरीका प्रवक्ता वेदप्रसाद गौतमका अनुसार गत साउन ११ गतेदेखि भदौ १५ गतेसम्ममा जनकपुरधाम नगरभित्रका विभिन्न ७ वटा पसलहरूमा दुबैजना आफूहरु अख्तियारको कर्मचारी हौं भन्दै अनावश्यक केरकार गरेका थिए ।
कागजातहरू देखाउनुस्, पसलको खानतलासी गर्छौं, तपाईंको पसल सिल गर्छौँ, भन्दै धाक धम्की दिई नगद रुपैयाँ असुल गर्ने तथा ठगी गर्ने उनीहरूलाई खोजतलास गरी सोमवार जनकपुरधाम उपमहानगरपालिका ७ भ्रमपुरा चोकस्थितबाट पक्राउ गरिएको डिएसपी गौतमले बताए ।
उनीहरूलाई बिआर ३० एबी ८८०४ नम्बरको भारतीय मोटरसाइकलसहित पक्राउ गरिएको हो ।
दुबैजनामाथि ठगी कसूर शीर्षक मुद्दामा दर्ता गरी जिल्ला अदालत धनुषाबाट ५ दिनको म्याद लिई थप अनुसन्धान गरिरहेको जिल्ला प्रहरी कार्यालय धनुषाले जनाएको छ ।