सामाजिक फीड-
दाङ, साउन ५ गते ।
दाङमा एक वृद्धामाथि सामूहिक बलात्कार भएको छ। ७३ वर्षौया वृद्धालाई बलात्कार गरेको आरोपमा प्रहरीले २ युवकलाई पक्राउ गरेको छ।
इलाका प्रहरी कार्यालयका डीएसपी पुष्पराज मल्लका अनुसार बिहीबार राति तुलसीपुर उपमहानगरपालिका–५ स्थित बसपार्कमा पार्किङ गरेर राखिएको ना ४ ख ७८४८ नम्बरको बसभित्र प्युठानकी ७३ वर्षीया वृद्धालाई सामूहिक बलात्कार गरिएको हो।
बलात्कार आरोपमा दाङकै तुलसीपुर उपमहानगरपालिका–१५ का ३० वर्षीय पुष्कर रोका र सल्यान कुमाख गाउँपालिका–७ का २० वर्षीय रेशम विकलाई प्रहरीले पक्राउ गरेको डीएसपी मल्लले जानकारी दिए।
वृद्धालाई बलात्कार भइरहेको सूचना आएपछि पुगेको प्रहरी टोलीले घटनास्थलबाट ती दुई युवकलाई पक्राउ गरेको प्रहरीले जनाएको छ।
प्रहरीका अनुसार आँखाको उपचार गर्न तुलसीपुर आएकी ती वृद्धा बसपार्क छेउमा उभिरहेका बेला ती युवकहरूले फकाएर बसभित्र लगी बलात्कार गरेका हुन् ।