सामाजिक फीड-
जनकपुरधाम, चैत १७ गते ।
अमेरिकी राष्ट्रपति डोनाल्ड ट्रम्पले इरानविरुद्ध जमिनमै सैन्य कारबाही गर्ने सम्भावना बढेको संकेत दिएका छन्।द वाल स्ट्रिट जर्नल रिपोर्टको अनुसार ट्रम्पको लक्ष्य इरानसँग रहेको समृद्ध युरेनियम भण्डार नियन्त्रणमा लिनु हो। हाल इरानसँग करिब ४०० किलोग्राम समृद्ध युरेनियम रहेको अनुमान छ, जसलाई आणविक हतियार निर्माणमा प्रयोग गर्न सकिन्छ।
ट्रम्पले आफ्ना निकट सहयोगीहरूलाई इरानले उक्त युरेनियम त्याग्नुपर्ने सन्देश स्पष्ट रूपमा दिएका छन्। कूटनीतिक वार्ताबाट समाधान ननिस्किए बल प्रयोग गरेरै भण्डार कब्जा गर्ने रणनीति उनको रहेको बताइएको छ। यसैबीच, अमेरिकाले मध्यपूर्व क्षेत्रमा थप १० हजार सैनिक पठाउने योजना बनाएको छ, जसअन्तर्गत ३,५०० भन्दा बढी सैनिक पहिल्यै तैनाथ भइसकेका छन्।
प्राकृतिक युरेनियममा उपयोगी अंश कम हुने भएकाले यसलाई ‘सेन्ट्रिफ्यूज’ नामक विशेष मेसिनमार्फत शुद्ध बनाइन्छ, जसलाई युरेनियम संवर्धन भनिन्छ। इरानका प्रमुख आणविक भण्डार इस्फहान र नातान्जजस्ता पहाडी क्षेत्रका भूमिगत संरचनामा सुरक्षित राखिएको विश्वास गरिन्छ।
यसअघि ट्रम्पले अमेरिकी आक्रमणबाट इरानको आणविक कार्यक्रम पूर्ण रूपमा ध्वस्त भएको दाबी गरेका थिए। तर पछिल्लो जानकारीअनुसार धेरैजसो युरेनियम नष्ट नभई भग्नावशेषमुनि सुरक्षित रहेको देखिएको छ। इरानका विदेशमन्त्रीले भने हाल उक्त युरेनियम निकाल्ने कुनै योजना नरहेको बताएका छन्। यद्यपि, इरानसँग अझै पनि युरेनियम थप शुद्ध बनाउने क्षमता र नयाँ गोप्य स्थल निर्माण गर्ने सम्भावना कायम छ।
ट्रम्प स्वयं लामो युद्धमा संलग्न हुन इच्छुक देखिँदैनन्। उनका केही सल्लाहकारहरूले उनलाई आन्तरिक मुद्दा र आगामी निर्वाचनमा ध्यान केन्द्रित गर्न सुझाव दिइरहेका छन्, जहाँ रिपब्लिकन पार्टीमाथि दबाब बढ्दो छ।
विज्ञहरूका अनुसार युरेनियम जफत गर्न जमिनमा कारबाही गर्नु अत्यन्तै जटिल र जोखिमपूर्ण कार्य हो। यसका लागि ठूलो संख्यामा अमेरिकी सेना इरानभित्र प्रवेश गर्नुपर्ने हुन्छ, जसले मानवीय क्षति र सैनिक हताहतीको जोखिम बढाउँछ।
सैन्य रणनीतिअनुसार, पहिलो चरणमा लक्षित क्षेत्र सुरक्षित गर्नुपर्नेछ, जहाँ इरानी क्षेप्यास्त्र र ड्रोन आक्रमणको खतरा रहन्छ। त्यसपछि इन्जिनियरहरूले भग्नावशेष हटाउने तथा सम्भावित ‘ल्याण्डमाइन’ वा धरापहरू निष्क्रिय पार्नेछन्। अन्ततः विशेष बलले युरेनियम फेला पारी सुरक्षित रूपमा निकाल्नेछ, जसलाई ४०–५० वटा विशेष सिलिन्डरमा भण्डारण गरी स्थानान्तरण गर्न सकिन्छ।
यदि अमेरिकाले जबरजस्ती यस्तो कदम चालेमा इरानबाट कडा प्रतिकार हुने सम्भावना उच्च छ, जसका कारण द्वन्द्व हप्तौँसम्म लम्बिन सक्ने आँकलन गरिएको छ।
फाएजा फहमीदा सामाजिक फीडकी संवाददाता हून् ।