सामाजिक फीड-
जनकपुरधाम, फागुन ७ गते ।
सर्लाहीको मलंगवामा आज दिउँसो गोली लागेर एक बालक घाइते भएका छन् । मलंगवा नगरपालिका ४ निवासी रामविश्वास रामका १५ वर्षीय छोरा आकाश राम गोली लागेर घाइते भएको जिल्ला प्रहरी कार्यालय सर्लाहीले जनाएको छ ।
मलंगवा ४ स्थित ‘ढाकाबोर्डर’ भन्ने स्थानमा निर्माणाधीन मन्दिरमा फेला परेको बेवारिसे पेस्तोल खेलाउने क्रममा बालकलाई गोली लागेको हो । बालकको दाहिने हातको पञ्जामा गोली लागेको जिल्ला प्रहरी कार्यालयका प्रवक्ता प्रहरी नायब उपरीक्षक सरोज राईले जानकारी दिए ।
निर्माणाधीन हनुमान मन्दिरभित्र कुनामा रातो कपडाले बेरिएको वस्तु खोली हेर्दा पेस्तोल भेटिएको र सो पेस्तोल नक्कली होला भनी चलाउने क्रममा पड्किँदा बालक घाइते भएको प्रहरीले जनाएको छ ।
गोली लागेर घाइते भएका बालकको प्रादेशिक अस्पताल मलंगवामा उपचार भइरहेको प्रहरीले जनाएको छ । यस सम्बन्धमा थप अनुसन्धान भइरहेको जिल्ला प्रहरी कार्यालय सर्लाहीले जनाएको छ ।