सामाजिक फीड-
जनकपुरधाम, चैत १६गते ।
मधेश प्रदेशका मुख्यमन्त्री सतिशकुमार सिंहको नेतृत्वमा सिरहाको मिर्चेया नगरपालिकामा रहेका निजी अस्पताल तथा स्वास्थ्य संस्थाहरूको अनुगमन गरिएको छ।
अनुगमनपछि १३ वटा स्वास्थ्य संस्था अवैध रूपमा सञ्चालनमा रहेको पाइएपछि बन्द गराइएको छ।
मुख्यमन्त्री सिंहसहितको टोली शनिबार मिर्चैया पुगेपछि स्वास्थ्य सेवा सञ्चालन अनुमति नलिएका आठवटा अस्पताल र पोलिक्लिनिकका सञ्चालक तथा स्वास्थ्यकर्मीहरू फरार भएका छन्।
मुख्यमन्त्रीका प्रेस सल्लाहकार अनिलकुमार कर्णका अनुसार अनुगमनको खबर फैलिएपछि ती स्वास्थ्य संस्थाहरू बन्द गरिएका थिए।
मुख्यमन्त्री सिंहको टोलीले १४ वटा निजी अस्पताल तथा पोलिक्लिनिकको अनुगमन गर्दा १३ वटा अनाधिकृत रूपमा सञ्चालनमा रहेको फेला परेको थियो। ती अस्पताल तथा पोलिक्लिनिक बन्द गर्न निर्देशन दिइएको छ।
बन्द गरिएका स्वास्थ्य संस्थाहरूमा समित माउन्ट हस्पिटल प्रालि, एस जेके पोलिक्लिनिक, मंगलम हेल्थ केयर सेन्टर, सिद्धकामना हस्पिटल, शान्ति हेल्थ केयर, बाल संसार हेल्थ केयर, राम ओरल एण्ड डेन्टल क्लिनिक, रेखा नर्सिङ होम, मिथिला चश्माघर आँखा उपचार केन्द्र, बालकल्याण हेल्थ केयर, विष्णु पोलिक्लिनिक, लक्ष्मी हेल्थ केयर र लाइफलाइन क्लिनिक रहेका छन्।
यसैबीच, मिर्चेया नगरपालिकाबाट १५ शय्याको सेवा सञ्चालन अनुमति लिएको मनकामना मिड इस्टर्न अस्पतालमा २५ शय्याभन्दा बढीको सेवा सञ्चालन भइरहेको भेटिएकाले १५ दिनभित्र मापदण्डअनुसार सेवा सञ्चालन गर्न निर्देशन दिइएको छ। स्वास्थ्य तथा जनसंख्या मन्त्रालयका जनस्वास्थ्य अधिकृत सन्तोषकुमार ठाकुरका अनुसार सो अस्पतालले एनेस्थेसियाविना मेजर शल्यक्रिया गरिरहेको र भेन्टिलेटरको सुविधा नभएको पाइएको छ।
अनुगमनका क्रममा सिद्धकामना हस्पिटलका सञ्चालक तथा स्वास्थ्यकर्मीहरूले अस्पतालमा उपचाररत आठ बिरामीलाई छाडेर भागेका थिए। सोही क्रममा आफूहरू स्वास्थ्यकर्मी भएको दाबी गर्ने दुईजनालाई प्रहरीले नियन्त्रणमा लिएको थियो, तर निर्देशन अनुसार शनिबार नै छाडिएको जनाइएको छ।