सामाजिक फीड,
सर्लाही, २३ जेठ । सर्लाहीमा भएका छुट्टाछुट्टै दुर्घटनामा दुई जनाको मृत्यु भएको छ।
दुर्घटनामा बाग्मती नगरपालिका २ डुमरी टोल बस्ने २० वर्षीय दिपशरण चालिसे र बाराको कोल्हबी नगरपालिका १ बस्ने ६५ वर्षीय निलबहादुर प्रसाईको मृत्यु भएको हो । हरिवन नगरपालिका १० सुखेपोखरीस्थित पूर्वपश्चिम राजमार्गमा पश्चिमबाट पूर्वतर्फ जादैँ गरेको ना. ६ ख ४९८९ नम्बरको ट्रकले विपरीत दिशाबाट आउँदै गरेको ना. ६४ प ६०२५ नम्बरको मोटरसाइकललाई ठक्कर दिएको थियो।
दुर्घटनामा मोटरसाइकल चालक चालिसेको घटनास्थलमै मृत्यु भएको जिल्ला प्रहरी कार्यालय सर्लाहीका प्रवक्ता दीपक श्रेष्ठले जानकारी दिए । उनकाअनुसार ठक्कर दिने ट्रकसहित ट्रक चालक इश्वरपुर नगरपालिका-१३ श्रीपुर बस्ने २६ वर्षीय सोलिन्द्र कुमार कुश्वाहालाई प्रहरीले नियन्त्रणमा लिएको छ ।
त्यस्तै, मंगलबार दिउँसो बाग्मती १ मिलन चोकस्थित पूर्वपश्चिम राजमार्गमा पूर्वबाट पश्चिमतर्फ आउँदै गरेको बा. ९१ प ९३६२ नम्बरको मोटरसाइकल अनियन्त्रित भई दुर्घटना हुँदा मोटरसाइकलको पछाडि सवार प्रसाईँको उपचारका क्रममा आज मृत्यु भएको प्रहरीले जनाएको छ।