सामाजिक फीड,
रौतहट, १८ जेठ । रौतहटमा बिहीबार साझँ आएको हावाहुरीले कैयौं घरको छाना उडाएर लाखौँ बराबरको क्षति भएको छ। चन्द्रपुरमा आएको हावाहुरीले पोलहरू ढलेर विभिन्न ठाउँको विद्युत अवरुद्ध भएको छ ।
हावाहुरीले चन्द्रपुर नगरपालिका–६ स्थित सत्यनारायण भगतको घरको एसबेस्टसको छाना उडाउँदा ८ लाखभन्दा बढीकाे क्षति भएको छ। त्यसैगरी वडा ५ का महिचन साह, रूपनारायण साह, प्रभुराज सिलवाल, रामाबिनय यादव, वडा ६ का भिमाबिर पहरी,४ का सुन्तली पहरी, का धर्मेन्द्र माझी, रामवीर माझीलगायतका घरको छाना उडाएर २० लाख ६० हजार बराबरको क्षति भएको जिल्ला प्रहरी प्रवक्ता डीएसपी एलिजा गिरीले बताएकी छिन् ।
चन्द्रपुरमा ५० भन्दा बढी विद्युत पोल ढलेका छन् । हावाहुरीले दर्जनौं बिजुलीको पोल भाचिनुका साथै एउटा २०० केवीको ट्रान्सफर्मरमा पनि क्षति पुगेको छ। विद्युत पोल, ट्रान्सफर्मर र अन्य उपकरणसमेत गरी ३० लाखभन्दा बढीको क्षति भएको नेपाल विद्युत प्राधिकरण चन्द्रनिगाहपुर शाखाका प्रमुख धीरेन्द्र यादवले बताएका छन्। हावाहुरीले गरेको क्षतिबारे अनुगमन तथा भाँचेको पोल गाड्ने काम भइरहेका कारण चन्द्रपुरको अधिकांश स्थानमा विद्युत अवरुद्ध भएको प्रमुख यादवले जानकारी दिएका छन् ।
त्यस्तै हावाहुरीले कटहरियास्थित एउटा ११ केबीको पोल ढलेको छ। हावाहुरीले फलफूल तथा अन्नबालीमा समेत क्षति पुर्याउँदा किसानहरू मर्कामा परेका छन् । बिहीबार साँझको हावाहुरीले जिल्लाका अन्य स्थानमा सामान्य क्षति भएको जिल्ला प्रहरी कार्यालय रौतहटले जनाएको छ ।