बिहार, १५ फागुन । भोजपुरी फिल्म उद्योगका चार चर्चित कलाकारको सडक दुर्घटनामा ज्यान गएको छ । भारतको बिहार राज्यस्थित कैमुरमा भएको सडक दुर्घटनामा भोजपुरी फिल्म जगतले चर्चित कलाकारहरू गुमाएको हो ।
मृत्यु हुनेमा भोजपुरीका चर्चित गायक तथा अभिनेता पुण्यश्लोक पाण्डेय ‘छोटु पाण्डेय’, मोडल तथा अभिनेत्री सिमरन श्रीवास्तव, आँचल तिवारी, गीतकार सत्य प्रकाश मिश्रा ‘बैरागी बाबा’ छन् । यो दुर्घटनामा अन्य पाँच सर्वसाधारणको पनि मृत्यु भएको छ ।
आइतबार छोटु पाण्डेय स्कार्पियोबाट आफ्नो पूरै टीमसहित एक कार्यक्रममा भाग लिन उत्तर प्रदेश गइरहेका थिए । त्यसक्रममा बिहारको कैमुर जिल्लास्थित मोहनिया थाना क्षेत्रको एनएच २ स्थित देवकली नजिकै अचानक एक मोटरसाइकल स्कार्पियोसामु आइपुग्यो । मोटरसाइकललाई जोगाउने क्रममा स्कापियो अनियन्त्रित भएर एनएच सडकमै बजारियो । स्कार्पियोमा सवार रहेकाहरू बाहिर निक्लन खोजिरहेका बेला पछाडिबाट आएको एउटा कन्टेनरले उनीहरूलाई ठक्कर दिएको थियो ।
दुर्घटना यति ठूलो थियो कि स्कार्पियो टुक्रा–टुक्रा भएको छ । सोमबार बिहान मात्र मृतकहरूको सनाखत भएको हो । दुर्घटनापछि कन्टेनर चालक फरार भएका छन् । बिहारका मुख्यमन्त्री नितिश कुमारले पनि मृतकप्रति श्रद्धाञ्जली दिएका छन् ।