सामाजिक फीड-
जनकपुरधाम, कार्तिक १३ गते ।
बंगालको खाडीमा विकास भएको देखिएको मोन्था चक्रवातको प्रभाव मधेस प्रदेश सहित नेपालभर देखिन थालेको छ । मोन्था चक्रवातको असर बुधबार रातिदेखि नै देखिन थालेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
बिहीबार बिहान काठमाडौं उपत्यकासहित कोशी, मधेश र बागमती प्रदेशका केही स्थानहरूमा, लुम्बिनी, गण्डकी र कर्णाली प्रदेशका एक–दुई स्थानमा हल्का वर्षा भइरहेको छ।
महाशाखाका अनुसार यो चक्रवातले भित्र्याउन सक्ने प्रणालीका कारण बिहीबार बिहानदेखि शुक्रबार बिहानसम्म नेपालको कोशी, बागमती र गण्डकी प्रदेशका उच्च पहाडी तथा हिमाली भेगमा भारी हिमपात हुनुका साथै कोशी, मधेसभरि र लुम्बिनी प्रदेशका एक–दुई स्थानमा भारी वर्षा हुन सक्ने छ।
कोशी, मधेस, बागमतीका सबै जिल्लामा सतर्कता अपनाउन भनिएको छ । त्यस्तै दाङ, कपिलवस्तु, रूपन्देही, नवलपरासी, मुस्ताङ, मनाङ, गोरखा, नवलपुर आदि जिल्लामा सतर्कता अपनाउनुपर्नेछ।
महाशाखाले लम्जुङ, कास्की, म्याग्दी, गुल्मी, पाल्पा, अर्घाखाँची, बागलुङ पर्वत, स्याङ्जा, तनहुँ आदि जिल्लामा मौसमसम्बन्धी सूचनाप्रति अद्यावधिक रहनुपर्ने बताएको छ।
मौसमविद् विनोद पोखरेलले बुधबार रातिबाट आएको प्रणालीले नेपालको धेरै ठाउँमा भारि वर्षा गराउने बताए । उनले काठमाडौं लगभग २४ घन्टासम्म पानी पर्ने प्रक्षेपण रहेको बताए ।
यस्तै, मधेस र कोशीमा ३६ घन्टासम्म वर्षा हुने विभिन्न मोडलले देखाएको पोखरेलले बताए ।
फाएजा फहमीदा सामाजिक फीडकी संवाददाता हून् ।