काठमाडौँ, १९ साउन । प्रधानमन्त्री पुष्पकमल दाहालले गौर हत्याकाण्डका पीडितहरूलाई वार्ता आउन आग्रह गरेसँगै शनिबार बिहान वार्ता हुने निश्चित भएको छ । प्रधानमन्त्री दाहालसँग शनिबार बिहान ८ बजे वार्ता हुने तय भएको संघर्ष समितिले जनाएको हो ।
बिहीबार प्रधानमन्त्रीको निजी सचिवालयले समितिका संयोजक रूपसागर उपाध्यायका नाममा पत्र जारी गर्दै वार्ताका लागि आग्रह गरेको थियो । गौर हत्याकाण्डका पीडितहरूले रौतहटको चन्द्रपुरमा बुधबार सात दिनदेखि धर्ना जारी राखेका छन् । १७ वर्षअघि भएको गौर हत्याकाण्डका पीडितहरूले दोषीलाई कारबाहीको माग राख्दै धर्नामा बस्दै आएका हुन् ।
गत शनिबारदेखि निरन्तर धर्नामा बस्दै आए पनि माग सम्बोधनमा सरकारले चासो नदेखाएको पीडितहरूको गुनासो छ । उनीहरूले संघर्ष समिति नै गठन गरी आन्दोलनमा उत्रिएका छन् ।
२०६३ साल चैत्र ७ गते तत्कालीन मधेशी जनअधिकार फोरम र माओवादीनिकट राष्ट्रिय मधेशी मुक्ति मोर्चाले गौर नगरपालिका–५ स्थित राइस मिल्सको चौरमा एकैस्थानमा सभा आयोजना गरेपछि भिडन्त भएको थियो । भिडन्तमा २७ माओवादी कार्यकर्ताले ज्यान गुमाएका थिए ।
ज्यान गुमाउनेमा ५ महिला र २२ पुरुष थिए । त्यस्तै, ५३ जनाभन्दा बढी घाइते भएका थिए । झडपमा रौतहटका ९, मकवानपुरका ८, बाराका ४, बाजुरा, सिन्धुली, पर्सा र दाङका एक/एक गरी २७ वाईसीएल कार्यकर्ताको मृत्यु भएको थियो । मृतकका परिवारले ९ महिनापछि राज्यबाट १० लाखका दरले क्षतिपूर्ति पाएका थिए ।
तर, अझैसम्म न्याय नपाएको भन्दै गौर हत्याकाण्डका पीडितहरू आन्दोलित भएका हुन् । हाल जसपाका अध्यक्ष रहेका तत्कालीन फोरमका अध्यक्ष उपेन्द्र यादवसहितका नेतालाई कारबाही गर्नुपर्ने उनीहरूले माग गर्दै आएका छन् ।
