मकवानपुर, १० असार । हेटौँडामा टिपरले स्कुटरलाई ठक्कर दिँदा एक जनाको मृत्यु भएको छ । गएराति भैँसेबाट हेटौंडातर्फ आउँदै गरेको बागमती प्रदेश ०३–००२प ६४४ नम्बरको स्कुटरलाई विपरीत दिशाबाट आएको बागमती प्रदेश०३–००१ख ८५१ नम्बरको टिपरले ठक्कर दिएको छ ।
उपमहानगरपालिका–२ चौकीटोलमा भएको दुर्घटनामा स्कुटरमा पछाडि सवार हेटौँडा–१ जरुवाटोलका २५ वर्षीय अमित कपाडीको मृत्यु भएको हो ।
ठक्करबाट घाइते कपाडीको हेटौँडा अस्पतालमा उपचारका क्रममा मृत्यु भएको प्रहरी निरीक्षक रामचन्द्र घिमिरेले जानकारी दिएका छन् । स्कुटरका चालक सामान्य घाइते छन् । ठक्कर दिने टिपर र चालकलाई प्रहरीले अनुसन्धानका लागि हिरासतमा लिएको छ।
