काठमाडौँ, २१ वैशाख । पूर्वउर्जामन्त्री तथा नेकपा एमालेका सचिव टोपबहादुर रायमाझीका छोरा सन्दीप रायमाझीलाई आज अदालतमा उपस्थित गरिएको छ । नेपालीलाई भुटानी शरणार्थी बनाएर अमेरिका पठाउने कार्यमा संलग्न रहेको आरोप लागेका रायमाझीलाई पक्राउ गरी अदालतमा उपस्थित गराइएको हो ।
उनलाई बिहीबार बिहान बुटवलबाट काठमाडौँ ल्याइएर जिल्ला अदालत काठमाडौँमा उपस्थित गराएको जिल्ला प्रहरी परिसर काठमाडौँका एसपी सीताराम रिजालले जानकारी दिए । सन्दीपमाथि नेपालीलाई भुटानी शरणार्थीको कागजपत्र बनाएर अमेरिका पठाउने आरोप लागेकाे छ ।
नक्कली शरणार्थी प्रकरणमा नाम मुछिएपछि टोपबहादुर रायमाझी र उनका छोराविरुद्ध बुधबार पक्राउ पुर्जी जारी भएको थियो । रायमाझीसँगै नक्कली भुटानी शरणार्थी बनाएर अमेरिका पठाउने खोज्ने ८ जना पक्राउ परिसकेका छन् ।
पक्राउ परेका ५० वर्षीय सानु भण्डारीले रायमाझीको नाम पनि बयानमा खुलाएका थिए । यही प्रकरणमा उपराष्ट्रपतिको कार्यालयका सचिव टेकनारायण पाण्डेलगायत पक्राउ परिसकेका छन् ।
