सामाजिक फीड-
जनकपुरधाम, मंसिर १७ गते ।
चिनियाँ प्रविधि कम्पनी ह्वावेले मङ्गलबार गुआङडोङ प्रान्तको सेन्जेन सहरमा आफ्नो पहिलो लक्जरी विद्युतीय गाडी मइस्ट्रो एस ८०० ईभी सार्वजनिक गरेको छ। यो गाडीलाई लक्जरी ब्रान्ड रोल्स रोयस र मर्सिडिज मेब्याचसँग प्रतिस्पर्धा गर्नसक्ने क्षमताको रूपमा हेरिएको छ।
ह्वावेले स्थानीय अटो निर्माता जेएसीसँग सहकार्य गरी मइस्ट्रो ब्रान्ड अन्तर्गत यो चौथो गाडी सार्वजनिक गरेको हो। यसअघि कम्पनीले तीन ब्रान्डहरू अन्य सवारी निर्मातासँग सहकार्य गरी बजारमा ल्याइसकेको थियो।
विशेष विवरण र मूल्य
मइस्ट्रो एस ८०० ईभी ५,४८० एमएम लम्बाइ, २,००० एमएम चौडाइ, १,५३६ एमएम उचाइ र ३,३७० एमएम ह्विलबेससहित चिनियाँ बाटोमा कुद्ने ९९.९९% गाडीभन्दा ठुलो रहेको दाबी गरिएको छ। गाडीको मूल्य १० लाखदेखि १५ लाख युआन (करिब एक करोड ८६ लाखदेखि दुई करोड ७९ लाख रुपैयाँ) तोकिएको छ।खरिद गर्न चाहनेले अग्रिम रूपमा २० हजार युआन (करिब तीन लाख ७२ हजार रुपैयाँ) तिरेर प्रि-अर्डर गर्न सक्छन्।
प्रविधि र निर्माण
यो मोडेल ह्वावेको दोस्रो पुस्ताको ट्युलिङ इन्टेलिजेन्ट च्यासिसमा निर्माण भएको पहिलो गाडी हो। गाडीमा लेभल थ्री इन्टेलिजेन्ट ड्राइभिङ आर्किटेक्चर प्रयोग गरिएको छ।
जेएसी मोटरका अध्यक्ष शियाङ सिङचुले यस मोडेलमा उच्च स्तरका प्रविधिहरू समावेश गरिएकाले यसको विकास, निर्माण, वितरण र सर्भिस सपोर्टमा विशेष ध्यान दिइएको बताए।
बजारको प्रतिक्रिया
ह्वावेको जानकारी अनुसार गाडी घोषणा भएको दुई दिनभित्रै २,१०० भन्दा बढी प्रि-अर्डर प्राप्त भएको छ। यो तथ्यलाई चिनियाँ सञ्चारमाध्यमहरूले ठुलो सफलता मानिरहेका छन्।
गाडीको औपचारिक बजार उपलब्धता र थप विस्तृत विवरणहरू आगामी दिनमा सार्वजनिक हुने अपेक्षा गरिएको छ।
