सामाजिक फीड-
१६ गते जनकपुरधाम
नेपालमा धान र चामलको आयात लगातार तेस्रो वर्ष घटेको सरकारी तथ्याङ्कले देखाएको छ। भन्सार विभागका अनुसार आर्थिक वर्ष २०८०/०८१ मा २२ अर्ब २२ करोड रुपैयाँको धान र चामल आयात भएको छ। यो आर्थिक वर्ष अघिल्लो वर्ष २०७९/०८० को तुलनामा १४ अर्ब ४३ करोड रुपैयाँले कम हो।
आर्थिक वर्ष २०७९/०८० मा ३६ अर्ब ६५ करोड रुपैयाँको धान र चामल आयात भएको थियो। यसअघि, आर्थिक वर्ष २०७८/०७९ मा ४७ अर्ब ५७ करोड रुपैयाँको धान र चामल आयात भएको थियो।
आयात घट्नुका सम्भावित कारणहरू
विशेषज्ञहरूका अनुसार धान र चामलको आयातमा गिरावट आउनुका विभिन्न कारण हुन सक्छन्। उत्पादन वृद्धि, भातको विकल्पका रूपमा अन्य खाद्यान्नको उपभोग वृद्धि, तथ्याङ्कमा गडबडी, र वैदेशिक रोजगारी वा अध्ययनका लागि विदेश जाने नेपालीहरूको संख्यामा वृद्धि केही प्रमुख कारण हुन्।
सरकारी तथ्याङ्कले आर्थिक वर्ष २०८०/०८१ मा धान खेतीको क्षेत्रफल घटे पनि उत्पादन भने ४.३३ प्रतिशतले वृद्धि भएको देखाएको छ। अघिल्लो वर्ष ५७ लाख २४ हजार २३४ मेट्रिक टन धान उत्पादन भएको थियो भने यसअघि ५४ लाख ८६ हजार ४७२ मेट्रिक टन मात्र थियो।
धान र चामलको आयात घट्नु नेपालको कृषि क्षेत्रको सुधार र आन्तरिक उत्पादनमा निर्भरता वृद्धि भएको सकारात्मक सङ्केत हुन सक्ने जनाउँदै विज्ञहरूले स्वदेशी उत्पादन प्रवर्द्धनलाई थप प्राथमिकता दिनुपर्नेमा जोड दिएका छन्।
