सामाजिक फीड
जनकपुरधाम, जेष्ठ १८ गते
भन्सार दरमा वृद्धि भएपछि नेपाली बजारमा सुनको मूल्यले नयाँ रेकर्ड कायम गरेको छ। नेपाल सुनचाँदी व्यवसायी महासंघका अनुसार शुक्रबार छापावाल सुनको भाउ प्रतितोला १ लाख ४२ हजार २ सय रुपैयाँ पुगेको छ, जुन अघिल्लो दिनको तुलनामा १ हजार ७ सय रुपैयाँले बढी हो।
बजेटमार्फत सरकारले सुनमा लाग्ने भन्सार दर १५ प्रतिशतबाट २० प्रतिशत पुर्याएपछि मूल्यमा यो वृद्धि भएको हो। महासंघले बिहीबार र शुक्रबार सो भन्सार दर समायोजनसहित मूल्य तय गरेको छ।
तेजाबी सुनको मूल्य पनि वृद्धि भई प्रतितोला १ लाख ४१ हजार ५ सय रुपैयाँ पुगेको छ। यसअघि बिहीबार छापावाल सुन प्रतितोला १ लाख ४० हजार ५ सय रुपैयाँमा कारोबार भएको थियो।
सुनको मूल्य बढ्दा चाँदीको मूल्यमा भने गिरावट आएको छ। महासंघका अनुसार शुक्रबार चाँदीको मूल्य तोलामा २५ रुपैयाँले घटेर १ हजार ८७५ रुपैयाँमा कारोबार भइरहेको छ।