०२ कार्तिक, जनकपुरधाम। हिजो आयोजित एउटा कार्यक्रममा प्रधानमन्त्री एवं नेपाली काँग्रेसका सभापति शेरबहादुर देउवाले आगामी निर्वाचनमा सत्तारुढ गठबन्धनलाई ठूलो बहुमत दिएर मुलुकमा दिगो शान्ति र लोकतन्त्र स्थापना गर्न सहयोग गर्न मतदातालाई अपिल गरेका छन् ।
ललितपुरमा हिजो उहाँले रुख भएको ठाउँमा रुख, हथौडा र हँसिया र जहाँ कलम छ त्यहाँ कलमलाई भोट हाल्न सबैलाई आग्रह गर्नुभएको छ ।
पछिल्लो स्थानीय निर्वाचनमा कांग्रेसका सबै नेता कार्यकर्ता र आफूले सत्तारुढ गठबन्धनका उम्मेदवारलाई मतदान गरेको तथ्यलाई स्मरण गर्दै देउवाले आगामी निर्वाचनमा पनि गठबन्धनको उम्मेदवारलाई सबैले भोट दिने विश्वास व्यक्त गरे ।
‘संसद बचाउन यो गठबन्धन बनेको हो र राम्रोसँग काम गरिरहेको छ, सबैतिरबाट आपसी विश्वास कायमै छ ।” तत्कालीन प्रधानमन्त्री केपी शर्मा ओलीले दुईपटक संसद विघटन गरेको घटनाको उल्लेख गर्दै उनले जनताले निर्वाचित संसद भएको बताए ।
प्रधानमन्त्री देउवाले आफ्नो भूमिकाको प्रशंसा गर्दै निर्धारित समय अनुसार निर्वाचन हुन लागेको पनि स्पष्ट पारे । मुलुकमा कोभिड–१९ महामारी र डेंगु रोगको प्रभावले आर्थिक क्षेत्रमा समेत असर परे पनि मन्त्रीहरूले राम्रो काम गरिरहेका छन् । ‘नेपाल असफल राज्य हुनबाट जोगिएको छ’ उनले भने, ‘नेपाल धेरै वर्ग, क्षेत्र र जातजातिको मुलुक भएकाले त्यसका लागि संविधानमा समावेशी लोकतन्त्र आएको छ ।” विश्वमा यस्तो विरलै हुने गरेको छ । ठूलो उपलब्धि र यसलाई जोगाउनु सबैको दायित्व हो।”
